ایشور کا جلوہ

ایشور کا جلوہ

راج شیکھر پاٹل اشٹور۔ رابطہ: 9448128346

سال 2023؁ء کے بھالکی اسمبلی انتخابات میں ایشور کھنڈرے کی جیت کا مارجن اور 2024 کے بیدر پارلیمانی انتخابات میں ان کے بیٹے ساگر کھنڈرے کی جیت بہت ہی آرام دہ اورسبھوں کو قائل کرنے والی تھی۔ اسے ڈاکٹر شیلندر بیلداڑے اور ڈاکٹر سِدھو پاٹل کی طرح 'اگر مگر' نہیں کہا جا سکتا، جوبیدر جنوب اور ہمناآباد کے گزشتہ اسمبلی انتخابات میں بہت معمولی مارجن سے جیتے تھے۔ بہت سے لوگ اسے ایک 'اتفاق' کہتے ہیں، کیونکہ اگر چندراسنگھ (آزاد) اور ایم ڈی فیاض (سی ایم ابراہیم کے بیٹے) نے بالترتیب بیدر جنوب اور ہمناآباد سے الیکشن نہ لڑا ہوتا، تو نتائج مختلف ہو سکتے تھے۔کرناٹک کے تین وزراء یعنی ستیش جارکی ہولی (وزیر تعمیرات عامہ)، ایچ سی مہادیوپا (وزیر سماجی بہبود) اور ایشور کھنڈرے (وزیر جنگلات)نے ایک جرأت مندانہ قدم اٹھایا اور 2024 کے انتخاب کے ذریعہ اپنے بچوں کو پارلیمنٹ کیلئے منتخب کرانے میں کامیاب رہے۔ جبکہ شیو آنند پاٹل (وزیر شوگر) بدقسمت رہے کیونکہ ان کی بیٹی باگل کوٹ سے پارلیمنٹ نہیں پہنچ سکیں۔ اگر وہ جیت جاتیں تو یہ ہمارے ضلع کے لیے اعزاز کی بات ہوتی کیونکہ وہ ہمارے ضلع کے معروف تالم پلی خاندان کی بہو ہیں۔

ایشور کاجلوہ:۔ واقعی یہ ہمارے ضلع کی تاریخ کے ساتھ ساتھ کھنڈرے خاندان کے لیے بھی ایک نایاب لمحہ ہے کہ باپ اور بیٹے کی جوڑی بیک وقت ریاستی حکومت میں وزیر اور لوک سبھا میں رکن پارلیمنٹ ہے۔ گزشتہ ماہ ان کے تاج میں ایک اور ہیرا اس وقت جڑا جب وہ بلا مقابلہ ”آل انڈیا لنگایت ویرشیو مہاسبھا“کے صدر منتخب ہوئے، جس کے لیے آج (22/مارچ 2026؁ء)کوان کی بڑے پیمانے پر پذیرائی کی جا رہی ہے۔ ضلع سینٹرل بینک (ڈی سی سی بینک)کی کمان بھی ان کے خاندان کے ہاتھ میں ہے جس کی سربراہی ان کے چھوٹے بھائی امر کمار کھنڈرے کر رہے ہیں، جو ڈوبے ہوئے قرضوں کی وصولی، فضول اخراجات روکنے اور غیر منظم عملہ کی اصلاح کی وجہ سے خبروں میں ہیں۔

ماضی:۔آنجہانی بھیمنا کھنڈرے 1999 میں مذکورہ تنظیم (آل انڈیا لنگایت ویرشیو مہاسبھا) کے صدر بنے تھے، جو ان کے اور ان کے خاندان کے لیے اچھا شگون ثابت نہ ہوا۔ ان کے مرحوم بیٹے ڈاکٹر وجے کمار کھنڈرے بی جے پی امیدوار سے ہار گئے تھے اور وہ دوسری مدت کے لیے کونسل میں نامزد نہ ہو سکے، باوجود اس کے کہ ریاست میں کانگریس کی حکومت تھی اور ایس ایم کرشنا کی قیادت میں وہ مضبوط پوزیشن میں تھے۔

حال:۔ آج ایشور کھنڈرے ایک طاقتور ضلع انچارج وزیر ہیں۔ وہ وزیر اعلیٰ اور نائب وزیر اعلیٰ کے ساتھ اچھے تعلقات برقرار رکھے ہوئے ہیں۔ انہوں نے کلیان کرناٹک کے ساتھ ساتھ ریاستی سیاست میں اپنا ایک مقام بنایاہوا ہے۔ اب تک انہوں نے ہر طرح کے تنازعات، خاص طور پر قیادت (وزیر اعلیٰ) کی تبدیلی کے معاملے سے دوری اختیار کر رکھی ہے۔ انہوں نے اور ہمارے ضلع کے دوسرے وزیر رحیم خان نے سدرامیا حکومت کے کچھ دیگر وزراء کے برعکس، قیادت کے حق یا مخالفت میں ایک لفظ بھی نہیں کہا۔ گزشتہ 18 سال میں (یعنی 2008 سے) ایشور کھنڈرے اور رحیم خان نے نہ صرف اپنی شخصیت کو دوبارہ ترتیب دیا ہے بلکہ اسے اعلیٰ درجے کی سیاسی سفارت کاری تک پہنچایا ہے جس پر میں ایک کہاوت نقل کرتا ہوں ”رہنے والے کو راجا بتائیں، آنے والے کو مہاراجہ“

مستقبل:۔ ایشور کھنڈرے نے 2008 سے انتخابات جیتنے کے فن میں مہارت حاصل کر لی ہے (سوائے 2019 کے پارلیمانی انتخابات کے)۔ انہوں نے 50 فیصد سے زیادہ ووٹ حاصل کیے۔ ان کی سخت طبیعت، منظم طرز زندگی اور مختلف زبانوں (کنڑ، ہندی، مراٹھی اور انگریزی) پر عبور سیاسی پنڈتوں کو انہیں مستقبل کے ممکنہ وزیر اعلیٰ کے امیدوار کے طور پر دیکھنے پر مجبور کر رہا ہے۔

طاقت اور کمزوری:۔ کئی بار میں نے ان کی طاقت کے بارے میں لکھا ہے، ان کی کمزوری یہ ہے کہ وہ آسانی سے نئے دوست نہیں بناتے۔ ہمناآباد اور بھالکی میں سیاسی مساوات ان دنوں بالکل مختلف ہے، جہاں کا اصول ہے کہ ”یا تو آپ ہمارے ساتھ ہیں یا ہمارے خلاف“ میں خواہش کرتا ہوں کہ وہ سابق وزرائے اعلیٰ دیو راج ارس اور ایس ایم کرشنا کی تقلید کریں۔ ارس نے سرکاری اسکیموں کے ذریعے غریب ترین لوگوں تک رسائی حاصل کی اور کبھی کسی طبقے کے خلاف بغض نہیں رکھا۔ کرشنا نے اپنی وسیع القلبی سے زیادہ سے زیادہ لوگوں کو ساتھ لے کر چلنے کی کوشش کی۔ ان دونوں نے آج کی سیاست کے برعکس سیاسی فائدے کے لیے کبھی ذات پات کا کارڈ نہیں کھیلا۔میں اپنی بات کا اختتام ایک ”وچن“ سے کرتا ہوں جسے وہ آگے بڑھنے کے لیے سیڑھی کے طور پر استعمال کر سکتے ہیں:

اسے اجنبی نہ سمجھو!

اور یہ نہ کہو ”یہ کون ہے؟ یہ کون ہے؟ یہ کون ہے؟“

بلکہ کہو، ”یہ ہمارا ہے! یہ ہمارا ہے! یہ ہمارا ہے!“

اے کوڈلا سنگم دیوا،

انہیں مجھے اپنے پیارے بیٹے کے طور پر دیکھنے دیں